ساحل این جی او اور زرینہ مظفر ٹرسٹ کے درمیان بچوں کے خلاف جنسی تشدد روکنے کے لیے معاہدہ

 

زرینہ مظفر ٹرسٹ اور ساحل این جی او کے درمیان تین سال کی مدت کے لیے ایک معاہدہ دستخط کیا گیا جس کے تحت زرینہ مظفر ٹرسٹ ساحل کے پلیٹ فارم سے قصور میں بچوں کے خلاف جنسی تشدد روکنے کے لیے کام کرے گی۔ ساحل کی ایگزیکٹو ڈائریکٹر مس منیزے بانو،پروگرام مینیجر ساحل رضوانہ اختر، مس سمیرا اور عمران صاحب اس موقع پر موجود تھے۔ معاہدے پر دستخط کی تقریب زرینہ  مظفر ٹرسٹ کے فیلڈ ہیڈ کوارٹر ہزارہ پبلک سکول و کالج چھانگا مانگا میں منعقد ہوئی۔ معاہدے پر زرینہ مظفر ٹرسٹ کے چئرمین جناب وقاص احمد خان اور ساحل کی ایگزیکٹو ڈائریکٹر مس منیزے بانو نے دستخط کیے۔

بڑوں کے اندرچھوٹوں کو طاقت کے زریعے ہراساں کرنے کی طاقت موجود ہوتی ہے۔ جب ایک بڑا اپنی طاقت یا بچے کے اعتماد کو استعمال کرتے ہوئے کسی بچے کو کسی جنسی عمل میں ملوث کرتا ہے تو ہم اسے جنسی تشدد کے نام سے پکارتے ہیں۔ یہ تمام معاشرتی حلقوں میں اور تمام تعلیمی مراحل پر دیکھنے میں آیا ہے۔ جنسی غنڈے کوئی بھی ہو سکتے ہیں۔ وہ بھی جن کو ہم روز ملتے ہیں۔

اس بات کےقوی امکانات موجود ہوتے ہیں کہ زیادہ تر واقعات میں مظلوم ظالم کو پہچانتا ہو۔ قصور میں بھی بچوں سے جنسی تشدد کے حوالے سے کافی واقعات رونما ہو چکے ہیں۔ اور ایسے واقعات کے کئی پولیس کیس قصور ضلع کے مختلف تھانوں میں درج ہیں۔ کئی واقعات تو ایسے ہیں جن کو بدنامی یا دشمنی کے ڈر سے پولیس کے پاس درج بھی نہیں کروایا جاتا۔ اس پروگرام کے تحت 15 ماسٹر ٹرینرز 1350 اساتذہ کو تین سال کے عرصے میں بچوں کے خلاف جنسی تشدد کو روکنے کے موضوعات پر تربیت دیں گے۔ یہ اساتذہ 80 طالبعلم فی کس کے لحاظ سے 108،000 طلبا کو تین سال میں اپنا پیغام پہنچائیں گے۔ اس پروگرام کے ذریعے بچوں کے حقوق اور جنسی تشدد کے موضوعات پر اساتذہ و طلبا و طالبات میں شعور اجاگر کیا جائے گا۔ ساحل این جی او ان اساتذہ کو وہ تمام ضروری لوازمات مہیا کرے گی جن کے ذریعے وہ اپنے کام کو پر اثر بنا سکیں گے۔

 رانا محمد اسحاق خان [ایم۔این۔اے] سردار محمد آصف نکئی [ایم۔این۔اے] شیخ علاوالدین [ایم۔پی۔اے] ملک جمیل احمد کلس صدر [پی۔پی۔پی]قصور، جی۔اے۔خان [ایڈووکیٹ] قصور ٹیچرز ایسوسی ایشن، پرایئویٹ سکولز ایسوسی ایشن قصور نے ساحل این جی او کی قصور میں جنسی تشدد کےخلاف کوششوں کو سراہا ہے ۔